Winformatik Product Backlog
Allagaq
PDF-inngorlugu pissarsiariniarukku assiliartaaraq tooruk.
Kommunit ataatsimoorullugu Winformatikkimik qarasaasiakkut
ingerlatsivianik ineriartortitseqqinneq ingerlattuagaq "SCRUM"-imik
periaatsimik taaneqartartoq atorlugu pivoq. Periuseq kommunit
tamatigut tamanik isiginnissinnaanissaannik isumannaarinissamik
siunertaqarpoq, pineqarlutik aqqusaakkat sukutsitaaniinneq,
tassuunakkullu suliniutit "inissisimatittuarneri", ilutigalugulu
kommunit ineriartuaarineq tigussaasoq iluarsisarlugulu
nutarsartuarsinnaallugu.
"SCRUM"-itut periutsip pingaarnertut malittarisassaasa ilagaat
inerisaaneq annikitsukkuutaanut, "Sprintsinik" taaneqartartunut
agguataarnissaat, taakkulu qaammammi ilivitsumi ataatsimi
ineriartuaarinermik iliuutsitut iluseqarajupput.
"Sprints"-inik pilersaarusiornerit qaammatikkaartuni killiffiit
pillugit ataatsimiinnerni pisarput, inerisaanermilu suliassat
iluarsineri sapaatit akunnerini killiffiit pillugit
ataatsimiinnerni pisarlutik. Pilersaarusiornernik killiffinnillu
ataatsimiinnerit kommuninit tamanit sinniisoqarlutik pisarput.
Ineriartuaarineq "Product Backlog"-imik tunngaveqarluni
pingaarnertut pilersaarusiugaallunilu tulleriiaarneqartarpoq.
Aaqqissuussivimmut kissaatigisanut ilisimasanut tamanut product
backlog allattuiffiuvoq. Tassanilu ilaapput maannakkut
inerisaavigineqartut, aammalu kommunini tulleriissitaasuni KIMIK
iT-mut suli aallartisarnissaannik qinnuigissutaanngitsut.
Product backlogi kommunimi sammisanik ilisimasallit aamma KIMIK
iT-p ineriartortitsisartuisa akornanni attaveqarnermut
tunngatinneqarpoq - taamaammallu avataaneersunut
paasiuminaassinnaavoq.
Allakkiaq una backlogimik maannakkut inerisakkap ilaanut
atuaruminarsagaangaatsiarpoq. Isumaqarpoq allakkiami matumani
sammisat ataasiakkaat ataqatigiissinniarneqarneri
pingaartinneqartut, aammalu maannakkut inerisakkatut suliarisat
ataasiakkaat imarisaat pingaarnertut takussutissiarineqarlutik.
Taamaalilluni Sprintit / qaammatit nikinnerisa kingorna allakkiap
nutarsartarnissaa angusariniarneqarpoq.
Novembari 2011-mut ingerlassatut ineriartortitatut
sammisat
Sammisaq 1: Suliniutinik aqutsineq/ataqatigiissaarineq
aamma aaqqissuussivimmik isumaginninneq
Backlogimi aalajangersimasut ilagaat inerisakkatut sammisamut
aalajangersimasuunngitsumut inissinneqarsinnaanngitsumut
suliniutinik aqutsineq ataqatigiissaarinerlu. Tassaniipportaaq
aaqqissuussivimmik isumaginninneq naammassisaq pillugu
nalunaarsuineq - tassaasoq kissaatigisanit annikitsuaqqanit
ikiuilluni sulianut annertuunut ataavartumik suliarisanut
tunngasoq. Inerisagassatut kissaatigisanit annikinnerit suliami
tassani ilaasutut paasineqartut, aammalu tulluartuusutut
erseqqittoorpasissut, aammalu inerisarnissaannut annerpaamik
ullualunnguaannarnik sivisussuseqartussatut naatsorsuutigineqartut
suleqatigiissitat attaveqarfiusuni immikkut
tulleriiaareqqaarinissamik utaqqeqqaarnani
aallartisarneqarsinnaasut. Suleqatigiissitat attaveqarfiusut
ataatsimiinneranni takkuttussami siullermi sulianik taama ittunik
suleqatigiissitat attaveqarfiusut ilisimatinneqarnissaannut KIMIK
iT soorunami pisussaatitaavoq.
Sammisaq 2: Akiliisitsiniartartutut oqartussaasullu
qarasaasiakkut paasissutissanik paarlaasseqatigiinneq
Tamanna aamma backlogimi aalajangersimasutut inissilluni
inerisarsimavoq. Akiliisitsiniarnermik atuuffiusoq
ilisimaneqartutut 1. april 2008-mi eqitigaasutut
ingerlatsivinngortinneqarpoq, sulili kommunini qarasaasiaqarfiit
aamma qitiusumik akiliisitsiniartartoqarfiup qarasaasiaqarfiisa
qanoq paasissutissanik paarlaasseqatigiittarnissaannik
aqqusaagassat tamakkiisut aalajangersarsimanngillat. Kommunit
paasissutissat pissarsiariniarnerinut taakkulu
Akiliisitsiniartartoqarfiup qarasaasiakkut attaveqarfissatut
aaqqiissutaanut: "Sulinal"-imut filit nuussortarnissaannut
tunngatillugu siuarsimasupilussuupput. Ajoraluartumilli suli
ilungersornartunik aaqqitassaqartoqarpoq, soorlu kommunit namminneq
akiliigassani isertitassatit pillugit paasissutissanik
"downloadersinnaanngillat", imaluunniit nalunaarsuutit
ingerlajuartussat ataasiakkaat ("uploads") inississimanersut
inississimannginnersulluunniit Sulinal annertoqatigiimmik
attaveqartitsinngilaq. Taamaattumik isumaqatigiissutaasunik
inerisakkanillu paasissutissanik paarlaasseqatigiinnerit
iluarsaateqqissaarnissaannut suli pisariaqartitsisoqarpoq.
Maannakkut filinik inuup suliaqarluni
paarlaasseqatigiittarnerisa ilaasa "webservices"-inik
taaneqartartunik taarserniarneri suliarineqarput. Winformatikkip
aamma Akiliisitsiniartarfimmi Sulinal/XAL-ip akornanni webservices
"maskiinamit-maskiinamut" akuleruffiunngitsumik
attaveqartitsissaaq. Qarasaasiaqarfiit akornanni taamatut
toqqaannartumik attaveqatigiittoqarneratigut ungasinnerusoq
isigalugu kommunit qitiusumillu akiliisitsiniartarfimmit
akiliisitsiniarluni sulianut ataasiakkaanut paasinninnerini
annertunerusumik naapertuuttoqalissasoq neriuutigineqarpoq.
Sammisaq 3: Winformatikkimi pisoqaanerit
nutarsarneri
Kommunini ataatsimoorussatut aaqqiissutaasunik teknologiikkut
nutarsaajuartoqarpoq. Winformatikki kommunini aqutsisoqarnermi
ukiut qulit qaangitsiarlugit aallaaviusimavoq. Ingerlatsivik
qarasaasiatigut teknologiimi allamik akusaanngitsumi
suliarineqarsimavoq - teknologiilu tamanna ukiuni taakkunani
inerisapiloorsimaqaaq. Kommunit "teknologiimi
ingerlariaqqiffiunngitsumut" inississannginnera isumannaarniarlugu,
ingerlatsivimmik ingerlataqarlutillu inerisarneranut
aningaasartuutit amerliartuinnalerlutik, aaqqiissutaasorpiaat,
minnerunngitsumillu tunua'tungaani inerisaanermut aallaaviusup
teknikkikkut sammisatigullu
nutaanerpaaffissaanniitittariaqarpoq.
Manna tikillugu Aaqqissuussiviup isumagineranut ingerlatsivik,
inunnik nalunaarsuisoqarfik aamma periarfissanut aaqqissuussivik
nutarsarneqarput aammalu teknologiikkut angusanut kingullerpaanut
naleqqutsilerlugit atugassiarineqarlutik, taamaattumillu ukiuni
tulliuttuni arlalissuarni atorneqarsinnaassapput. Maannakkut
naatsorsuuserivik, missingersuuserivik akiliisitsisarfillu
teknikkikkut nutarsarniarneqarput naqitanik arlalitsigut
anillatsitsivilersorlugit. Novembarip qaammataani
naatsorsuisarfittut nittartakkami qupperneq inerisaqqissavarput,
teknikkikkut pisoqalisimammat nutaanillu
atugassialersussammat.
Nutarsaanermik suliassat pingaannginnerusutut ingerlanneqarajupput
- taamaalillutillu inerisaanermik suliassanut pisariaqavissunut
naleqqiullutik tunuaamisinneqarajunnerusarlutik.
Sammisaq 4: Kommunini pisortanut paasisitsiniaavittut
aaqqissuussivik
Inuiaqatigiinni pisortanit paasissutissiinernik assorsuaq
pisariaqartitsisoqarpoq. Paasissutissat periusissatut
iliuusissatullu aalajangiussaqarnissamut atorneqarsinnaapput.
Taamaattorli pisortanit paasisitsiniutitut erseqqinnerusumik
atorneqalersinniarlugit paasissutissanik sorlernik
nassuiaasitsiniarnissaq assorsuaq ajornakusoorsimavoq. Taamaattumik
Kommuneqarfiit Ataatsimoorlutik Qarasaasiatigut Suleqatigiiffiata,
KAQA-p qaammatikkaartumik atugassiaq nassiunneqartartoq
suliarisimavaa, ilaatigut kommunini kisitsisit tunngavigisartakkat
Kanukokap ukiumoortumik tamanut saqqummiuttarsimasaanik
imaqartoq.
Qaammammoortumik nassiuttagaq paasissutissanik amerlanernik
ilalersortuarneqarpoq, soorlulusooq ilisimatitsissutinik
maannakkumut tunnganerusunik ilalersorneqartarluni.
Nassiussukkat uani takuneqarsinnaapput:
http://www.kanukoka.gl/da/kommunale_sagsomraader/jura_administration_og_it/komlis
Sammisaq 5: Eqqaavilerinermut tunngasunut
aaqqissuussivik
Kommuneqarfimmi eqqaavilerinermik aqutsinissamut Winformatikki
aaqqissuussivimmik ilaneqarpoq. Kikkut eqqagaataat
aaneqartassappat, kikkullu naamik, akiliuteqartitsiniarneq allallu
tassani ilaassapput. Asiap NunaGIS-imi paasissutissaatitik
akaarinnillutik atukkiussimavaat, taamaalilluni B-normu
tunuliaqutaralugu Eqqaavilerinermut tunngasunut aaqqissuussivimmi
nunap assingani toqqaannartumik piviusunik "imaarsisarfissatut
najugaqarfiit" takutinneqarsinnaalerlutik.
Qaasuitsup Kommuniani tamarmi ingerlatsisoqarpoq, kommunillu
sinnerini ingerlatsisoqalernissaa sulissutigineqarpoq,
ingerlatsivimmi nutaami nalunaarsuisarfitik pioreersut
nalunaarsorlugillu naqqissorneri pissusiviusutigut
atuutsinneqaleriartortillugit. Taamaattorli piareersaatitut
ingerlatsinerup ilaatigut takutippaa nalunaarsugaatitoqqanut
naleqqiullugu annertungaatsiartumik "saliinissaq"
naatsorsuutigisariaqartoq, ingerlassarlu tamanna
pisariungaatsiarpoq eqqaavilerinermik aaqqissuussisoqarfimmik
pisariaqartitamik assigiissaarinissamik ilaqarmat.
Sammisaq 6: Innarluutilinnut
aaqqissuussivik
2010/2011-mi ukiup nikinnerani kommuneqarfiit innarluutilinnik
aqutsisoqarfik akisussaaffigilerpaat. Inunnik ataasiakkaanik
taakkulu innarluutaannik tamanik qitiusumik aaqqissuussamillu
nalunaarsuinermut Winformatikkip qupperneri naammassilerput,
maannalu innarluutilinnik suliaqartarnermut quppernerit
piariilerpavut - taamaalillutik kommunit akiliutinik,
namminersorlutik oqartussanit utertitsissutinik il.il.
tamakkiisumik takunniffeqalissallutik.
Immikkoortortami annertungaatsiartumik aningaasaqarpoq,
taamaattumillu ilaatigut aaqqissuussivimmik pitsaalluartumik
tamakkiisumillu suliaqarniarneq ilungersuutigineqarpoq.
Innarluutilinnik aqutsisoqarfimmut quppernerit tamaasa kalaallisut
qallunaatullu tamakkiisumik oqaasertaqarput. Ilanngullugu kommunini
tamani assigiimmik atorneqartussamik innarluutilinnut
ingerlatsivimmik inerisaasoqarnissaq alaatsinaanneqarpoq,
taamaalilluni assersuutigalugu inummik innarluutilimmik
innarluutaasa suussusersineranik nalunaarsuinerit assigiissitatut
ingerlatsivik aallaavigalugu assigiissaartumik pisassalluni,
ilaatigut inuit ataasiakkaat innarluutaannik suussusersiniarluni
ICD standard diagnosekoditut taaneqartartut atorneqarlutik.
Aqqusaagaq 1 - Kommunini tamani innarluutilinnut tunngaviusunik
paasissutissanik nalunaarsuineq ingerlanneqarpoq, sullitat
allanillu tunngaviusunik paasissutissat ingerlatitsisarfimmut
inissiisissorneri naammassineqareerlutik. Aqqusaagaq 2 -Sulianik
isumaginninnermik IPIS-imullu naatsorsueqqissaarineq
imarilersillugit allanngortinneqarpoq. Tamanna kommuninit
sammisanik suleqatigiissitat assut sulilluartut suleqatigalugit
inerisarneqarpoq. Aammalu innarluutilinnik ingerlatsisarfimmut
ICD-diagnosekodit taakkununngalu oqaasertaliussat nalunaarsorlugit
ilanngussorneqarput. Tamatumuuna innarluutilinnik ingerlatsivinni
sullitassanut nutaanut pilersinneqartunut innarluutaasa
suussusersinerisa erseqqinnerusumik nalunaarsornissaannik
periarfissiisoqarpoq. Tamakku saniatigut kommuninit sullitanut
allattorsimaffiit suli allat takkussimapput, aamma innarluutilinnik
ingerlatsivimmut nalunaarsorneqartussat. Aqqusaagaq 3 - Maanna
aningaasaqarnermik aqutsinermik imaqalerpoq, ilaatigut
ikiorsiissuteqartoqarneranut atatillugu atorneqartussamik. Taassuma
saniatigut akit, akinik naatsorsuinerit kontonullu pilersaarutit
nalunaarsorneqarsinnaallutillu innarluutilinnik ingerlatsivimmi
atorneqarsinnaassapput. Aqqusaagaq tamanna katitigaakannersuuvoq,
taamaattumillu kommunit aamma Namminersorlutik Oqartussat,
ilanngullugulu Danmarkimi Nunatta Sinniisoqarfia qanimut
suleqatigalugit inerisarneqassalluni.
Sammisaq 7: NemID atorlugu innuttaasunut sullissineq
qarasaasiatigoortoq
Pisortat ataatsimoorullugu Sullissivimmik suliniutaata imminut
kiffartuunnermi akiligassavinnut alaatsinaannermut malitsigitillugu
kommunit pilersitsineq Winformatikkip quppernerani
ingerlatitseqqiffigalugu Sullissivimmi piviusunik innuttaasunik
sullissinermi atugassiarpassuit atorneqarsinnaasussat inerisarneri
aallartisarpaat. Innuttaasup nammineq NemID-mik
kinaassusersinermigut atugassiat taakku innuttaasunut innuttaasunik
sullisinivinnik neqeroorfigissavaat - "Erniinnaartumik
aalajangiussinertut" taaneqartartunik, innuttaasut interneti
aqqutigalugu qinnuteqarsinnaaginnarani amerlanertigulli
qinnuteqaatigisaminut aamma akissummik pissarsiaqarsinnaalluni.
Innuttaasunik sullissinerup siulliup najugaqarnermut
uppernarsaatip naqitarinissaa neqeroorutiginnittoq misiliutitut
takussutissatut pisassaavoq, kommuninut arlalinnut
takutinneqareerluni.
Sammisaq 8: Najugaqarfimmi B-normunik
nalunaarsuiffiliorneq
Ukiut arlerlugit kommunini ataasiakkaanik piviusumik B-normup
suulluunniit pissarsiareriarsinnaannginnerat amigaataasimavoq.
Najugaqarfinni B-normunik nalunaarsuiffiit nalinginnarmik soorlu
regnearkimi assigisaaniluunniit allattugaataasarsimapput,
paasissutissanullu "pioqqaartunut" iserfissaqanngikkaanni
nalinginnarmik assilisamut innersuussisoqartarpoq, nutarsaanernik
kingullerpaanik imaqarajuttanngitsumut. Taamaattumik kommunini
tamani B-normunut nalunaarsuiffiliortoqarnissaq assorsuaq
pisariaqartinneqarpoq - taamaalilluni (kommunimi) kikkut tamarmik
paatsuungassuteqaratik B-normut sorliit atortuunersut sorliillu
atortuunnginnersut ilisimalissammassuk. Kommunimi B-normunik
nalunaarsuillunilu nutarsaajuarnermut kommunit ataatsimoorullugu
ingerlatsiveqalernissaannik eqqussinerup saniatigut taakku
atugaasarnerat sapinngisamik paatsuugassaajunnaarlunilu
pissusissamisut ataqatigiinnerpaanngornissaa isumannaarneqassasoq
neriuutaavoq. Najugaqarfimmi B-normunut nalunaarsuiffiusumut
Winformatikkimi ingerlatsiviit ilaat suli amerlanerit, soorlu
Eqqaavilerinermut ingerlatsivik suli sunniuteqarluarnerulissaaq
paasissutissat misissugarilersinnaalernerisigut. Ilutigalugulu
kommunit kingusinnerusukkut qitiusutut nalunaarsuiffinnit
ingerlatsivinnillu ataqatigiissitsinermik alliliinissamik
kissaateqalissappata, soorlu NunaGIS-imik imaluunniit Asiami
A-normunut nalunaarsuiffimmik, ingerlatseriaatsip suli
pisariunnginnerulersillugulu sunniuteqarnerulississavaa.
Sammisaq 9: Soraarnerussutisianut ingerlatsiviup
naammassinera
Winformatikkimi soraarnerussutisianut ingerlatsiviup
inerikkiartortinnera naammassivoq, qisuariaatillu tigusimasat
naapertorlugit kommunini aqutsinikkut sakkuusiviup allineqarnera
tikilluaqqusaasimasutut isigineqarsinnaalluni. Taamaattumik
mamaatsoorutigisimasaq taamaallaat tassaasimagunarpoq qitiusumik
akissarsialeriviup kommunit ataatsimoorussatut akissarsialeriffimmi
namminneq paasissutissaatiminnik maskiinatigut
attaveqartitsilersinnaanissaannut akuersitissimannginnera,
taamaattumillu paasissutissat taamaallaat inuup akulerunneratigut
Winformatikkip Akissarsiallu akornanni nuunneqarsinnaallutik,
tassunga atatillugu suliakkersuutit kukkusumillu
allattoqartarsinnaanera il.il. atugaasinnaallutik. Taamaattorli
Winformatikkip Akissarsiallu akornanni maskiinakkut
attaveqartoqarsinnaanissamut ammaasoqarsimarpasippoq. Sprintimi
tassani tamanna sulissutigeqqinneqassaaq, soraarnerussutisianut
ingerlatsivik ukiut nikinnerinut 2011/2012-imut piareersarnerata
saniatigut.
Sammisaq 10: Allakkat assigiissaakkat najoqqutassiaannik
iluarsaassineq
Ukiuni kingulliunerusuni Microsoftip allagaatit ilusaannik
assigiissaarinermut aammalu allagaatinik sanarfisarnermi
assigiissaakkanik atugassaatit tamanut saqqummiunnissaannut
tunngatillugu pitsanngorsarsimasupilussuuvoq. Tamanna
Winformatikkip allagaasiortarneranut nutarsaanermut atorneqassaaq,
ilutigalugulu Winformatikkimi allagaatinik atugassaatit
eqaallisarneqassallutik. Taamaalilluni assersuutigalugu
Innarluutilinnut atortakkami kommunini arlalinnit kissaaterujussuaq
akuersaarneqarpoq, allakkat ilusaannik assigiinngiiaartunik
kissaateqarnerit ilanngullugit.
Sammisaq 11: Meeqqat inissinneqarsimasut
suliaqarfiginerinik misissueqqissaarineq
Kommunini missingersuusiani meeqqanut inissinneqarsimasunut
aningaasartuutit annertungaatsiarput. Allaffissornermut
tunngatillugu immikkoortortap isumaginninnermik innarluutilinnillu
aaqqissuussivinnut tunngasuuvoq. Immikkoortortap Winformatikkimi
qanoq pitsaanerpaamik aqutsivigineqarsinnaanissaa, aammalu taamatut
aqutsisoqarneranut atugassianik nutaanik iluaqutaasussanik
inerikkiartortitsisoqarsinnaanersoq misissoqqissaarneqassaaq.
Misissueqqissaarineq inassutinik tigussaasunik
kinguneqartinneqassaaq.
Sammisaq 12: Winformatikkimi
assigiiaaqatigiikkaat
Assigiiaaqatigiikkaanik immikkoortiterineq tassaavoq
suliffissaaleqisut immikkoortiternerinut aaqqissuussivik, tassuuna
suliffeqarfeqarfimmi suliffissaaleqisut qanoq amerlatigisut
sulilernissamut piareersimanerinik, qanorlu tamatuma pinnginnerani
ilinniaqqittariaqarnerinik takussutissiisoqarsinnaalluni.
Winformatikkip suliffissaaleqisunik nalunaarsuisarfiani
inerisaanissamut assigiiaaqatigiikkaanik nalunaarsuinermut atortup
inerisaaviginissaata pisiarineqarnissaa Piareersarfimmik
suliniutip, tamatuminnga siammaanissamut akisussaasuusup
aalajangiussimavaa. Taamaalilluni Winformatik Kalaallit Nunaanni
Naatsorsueqqissaartarfimmut soorlulusooq Piareersarfimmik
ingerlatsisoqarfimmut assigiiaaqatigiikkaanik paasissutissanik
pilersuisinnaalissaaq.
Sammisaq 13: Inunnik nalunaarsuisarfimmut aqquserngit
inoqanngitsut
Manna tikillugu Winformatikkimi inunnik nalunaarsuivimmi
aqqusernit inunnik najugaqarfigineqanngitsut ilaasimanngillat.
Maannakkulli aatsaavissuaq eqqaavilerinermik ingerlatsivikkut
nutaakkut aqquserngit taakku Winformatikkimut nuussornissaannut
pisariaqartitsisoqalersimavoq. Tamatuminnga isumannaariniarlunilu
inerisaanissamik suliaq Eqqaavilerinermik ingerlatsiviup nutaap
siuariartuinnartutut atuutsikkiartorneranut atatillugu maannakkut
suliarineqarnissaa naatsorsuutigineqarpoq.
Kommunit ataatsimoorullugu pilersaarusiorlutik
ataatsimiinneranni 4. november 2011-mi
aalajangiunneqarpoq.
